Plantun de Prouvènço

Pèr coumpara dos planto d'encò nostre

Asphodelus cerasiferus & Myosotis arvensis

Alegue

Asphodelus cerasiferus

Xanthorrhoeaceae Asphodelaceae

Àutri noum : Pourracho, Bastoun-blanc, Asfodèlo.

Nom en français : Asphodèle-cerise.

Descripcioun :
L'alegue trachis dins la garrigo roucaiouso, pas trop liuen de la mar, ounte pòu crèisse à mouloun. Li fueio soun di tres coustat, pleno e verdalo, e si racino soun tuberouso. Èi pas ramificado coume sa cousino Asphodelus ramosus, e, pèr la pas counfoundre, fau verifica que lou boursoun madur fague mai de 8 mm. Asphodelus albus, éu, trachis en mountagno.

Usanço :
L'alegue èi pas di mai utilisa. Li flour soun manjadisso e li racino soun estado manjado dóu tèms di carestié. La racino èi couneigudo pèr faire pissa.

Port : Grando erbo
Taio : 80 à 150 cm
Fueio : costo paralèlo
Tipe bioulougico : Geoufite
Cicle bioulougico : Planto renadivo

Gènre : Asphodelus
Famiho : Xanthorrhoeaceae
Famiho classico : Asphodelaceae

Coulour de la flour : Blanco
Petalo : 6
Ø (o loungour) flour : 20 à 25 mm
Flourido : Printèms

Sòu : Ca
Autour basso e auto : Pancaro entresigna
Aparado : Noun
Remarco : Planto de coustiero
Abriéu à mai

Liò : Garrigo - Tepiero seco - Roucaio - Duno
Estànci : Termoumediterran à Subremediterran
Couroulougi : Estenomediterrano-Ouèst
Ref. sc. : Asphodelus cerasiferus J.Gay, 1857

Te-vese-e-t'ame(-de-champ)

Myosotis arvensis

Boraginaceae

Àutri noum : Ti-viéu-e-t'aìmi, Uei-de-l'enfant-Jèsu.

Noms en français : Myosotis des champs, Myosotis intermédiaire.

Descripcioun :
Aquéu te-vese-e-t'ame trachis di plano de coustiero fin qu'en mountagno. Es uno planto coumuno, mai pas toujour eisado de destria de si cousino. Dins lou group di flour pichoto (1 à 4 mm), soun pulèu li mai grando, si cambo soun un pau mai espésso (> 1mm), e emé d'enflourejado que fan mens de la mita de la planto. Se recounèis classicamen que li pecou di flour d'en bas dèvon èstre dous cop mai long que li sepalo di flour, mai sèmblo pas toujour lou cas.

Usanço :
Li flour podon se bouta dins lou mesclun. Se dis que li te-vese-e-t'ame soun vertuous contro l'enflamacioun, majamen pèr lis iue ("principe di signaturo").